HİCRAN MAHMUDOVA
t.ü.f.d., Bakı Dövlət Universieti
Arxeologiya və etnoqrafiya kafedrası
BAKI DÖVLƏT UNİVERSİTETİNİN 105 İLLİK TARİXİNDƏ
PROFESSOR HƏVİL HƏVİLOVUN XİDMƏTLƏRİ
DOI: https://doi.org/10.36719/2708-065X/106/110-114
Azərbaycanın XX əsr tarixində özünəməxsus yer tutan, müxtəlif sahələr üzrə görkəmli xadimlər, tədqiqatçılar, əsl vətənpərvər ziyalılar yetişdirmiş Bakı Dövlət Universitetinin bu il 105 illik yubileyi qeyd olunur. Məhz bununla bağlı BDU-nun ənənələrini qorumuş, ömrünü doğma universitetdə elm və təhsilə həsr etmiş müəllimlərimizin xatirəsinin anılması da bu baxımdan bir daha aktuallaşmışdır. Təqdim olunan məqalədə professor Həvil Abdulla oğlu Həvilovun “Etnoqrafiya” elminin tədrisi və tədqiqi ilə bağlı fəaliyyəti, xidmətləri araşdırılmışdır.
Araşdırma zamanı Həvil Həvilovun Azərbaycan və dünya xalqlarının etnoqrafiyası, maldarlıq təsərrüfatı, qarşılıqlı yardım formaları və s. problemlərlə bağlı tədqiqatlarının qısa xülasəsi verilmiş, görkəmli alim bir neçə prizmadan: tədqiqatçı – alim, savadlı pedaqoq, qayğıkeş, səmimi dost, yaxşı insan kimi dəyərləndirilmiş, elm yolundakı çətinliklərə baxmayaraq, əsl ziyalı kimi öz simasını qoruyub saxlamağı bacarması təqdir edilmişdir. Qeyd edilmişdir ki, bu 105 ildə Bakı Dövlət Universitetini zirvədə saxlayan məhz belə müəllimlərin qoruyub saxladığı və gənclərə ötürdüyü ənənələrdir.
Açar sözlər: BDU, 105 illik yubiley, Həvil Həvilov, etnoqrafiya, tədqiqatçı, müəllim.