MURAZ SÜLEYMANOV
Bakı Dövlət Universiteti
Beynəlxalq münasibətlər və iqtisadiyyat fakültəsinin doktorantı
Murazsuleymanov01@gmail.com
AZƏRBAYCAN RESPUBLİKASINDA E-HÖKUMƏTİN YARANMASI VƏ ELEKTRON İDARƏÇİLİYƏ DAİR QANUNVERİCİLİK BAZASININ FORMALAŞDIRILMASI
DOI: https://doi.org/10.36719/2708-065X/106/230-235
Məqalədə yeni dövlət idarəetmə forması kimi elektron hökumətin yaranmasından, formalaşmasından, aktuallığından və bu sahədə qəbul edilmiş qanunvericilik aktlarının əhəmiyyətindən bəhs olunur. Eyni zamanda, Azərbaycan Respublikasında elektron idarəçilik sahəsində həyata keçirilən islahatlar, qəbul edilən qanunlar şərh edilir və müvafiq təkliflər qeyd olunur. Müasir dövrdə elektron hökumət demokratiyanın bir göstəricisi kimi çıxış edir, çünki elektron hökumət özündə şəffaflıq, operativlik, səmərəlilik, nəzarət və hesabatlılıq kimi məfhumları ehtiva edir. Elektron hökumətə keçid inkişaf etməkdə olan ölkələrə nisbətdə inkişaf etmiş ölkələrdə daha erkən baş vermiş və formalaşdırılmışdır. Lakin e-hökumətin özəl xüsusiyyətlərindən biri onun dünya dövlətlərinin idarəçiliyi prosesinə daha sürətlə yayılması və formalaşması olmuşdur. Burada informasiya və kommunikasiya avadanlıqları müstəsna əhəmiyyətə malikdir. Texnologiyaların sürətli inkişafı dövlət idarəçiliyinə də təsirsiz ötüşməmiş və bu sahədə islahatların həyata keçirilməsini tezləşdirmişdir. Demokratik idarəetmənin bir göstəricisi kimi rəqəmsal idarəetmənin formalaşması hökumətlər qarşısında duran əsas məqsədlərdən biri olmuşdur. Azərbaycan Respublikasında da bu sahəyə son illərdə xüsusi diqqət yetirilməsi dövlət xidmətlərinin elektronlaşdırılması, vətəndaş-məmur münasibətlərinin minimuma endirilməsi və bütün proseslərdə şəffaflığın, təhlükəsizliyin təmin edilməsinə dəstək olmuşdur.
Açar sözlər: informasiya, idarəetmə, qanunvericilik, e-hökumət, rəqəmsallaşma.