SƏBİNƏ HƏSƏNOVA
Bakı Dövlət Universitetinin doktorantı
AZƏRBAYCAN VƏ QƏRB SLAVYAN ÖLKƏLƏRİ ARASINDA
BEYNƏLXALQ ƏLAQƏLƏRİN YARANMASI VƏ İNKİŞAFI
DOI: https://doi.org/10.36719/2708-065X/109/181-186
Azərbaycan ilə Qərb Slavyan ölkələri arasında beynəlxalq əlaqələrin yaranması XX əsrin sonlarından – Azərbaycan Respublikasının müstəqillik qazanmasından sonra sürətlə inkişaf etməyə başlamışdır. Bu münasibətlər siyasi, iqtisadi, mədəni və humanitar sahələri əhatə edir. Siyasi sahədə qarşılıqlı səfərlər, diplomatik nümayəndəliklərin açılması və beynəlxalq təşkilatlarda əməkdaşlıq əlaqələrin möhkəmlənməsinə səbəb olmuşdur. İqtisadi münasibətlər enerji sahəsində əməkdaşlıq, investisiya təşviqi və ticarət dövriyyəsinin artması ilə müşahidə olunur. Azərbaycan Respublikasının zəngin enerji ehtiyatları, xüsusilə neft və qaz ixracı bu əlaqələrdə mühüm rol oynayır. Mədəni sahədə isə qarşılıqlı tədbirlər, ali təhsil mübadilələri və elmi əməkdaşlıq xalqlar arasında anlayış və dostluğun inkişafına xidmət edir. Həmçinin, Qərb Slavyan ölkələrinin Avropa İttifaqında təmsil olunması Azərbaycanın Avropa strukturlarına inteqrasiya səylərində dəstəkçi rol oynamışdır. Ümumilikdə, Azərbaycan və Qərb Slavyan ölkələri arasında əlaqələrin yaranması və inkişafı qarşılıqlı maraq və strateji tərəfdaşlıq prinsipləri əsasında formalaşaraq regionda sülhə və sabitliyə töhfə verir.
Açar sözlər: Azərbaycan Respublikası, Qərb slavyanlar, xarici siyasət, beynəlxalq təşkilatlar, əməkdaşlıq.