ANARA MƏMMƏDOVA
Azərbaycan Universiteti Siyasi və
ictimai elmlər kafedrasının doktorantı
a.mammadli1986@gmail.com
BEYNƏLXALQ MÜNASİBƏTLƏRDƏ
STRATEJİ KOMMUNİKASİYALARIN ROLU
DOI: https://doi.org/10.36719/2708-065X/109/165-170
Mürəkkəb proseslərin cərəyan etdiyi beynəlxalq münasibətlər sistemində “strateji kommunikasiyalar” dövlətlərin informasiya siyasətini formalaşdırmaq, onların milli maraqları qorumaq və beynəlxalq imiclərini möhkəmləndirmək üçün mühüm vasitə rolunu oynamaqdadır. Bu məqalədə strateji kommunikasiyaların beynəlxalq münasibətlərdəki yeri və rolu təhlil olunur, xüsusilə də onların diplomatik fəaliyyət, daxili və xarici təhlükəsizliyin təmin edilməsi, böhran və riskli vəziyyətlərdə əhəmiyyəti, ictimai diplomatiya sahəsindəki rolu və zərurəti vurğulanır.
Strateji kommunikasiyalar dövlətlərin xarici siyasətində informasiyanın planlı və məqsədyönlü şəkildə yayılmasını təmin edir. Bu, milli maraqların beynəlxalq aləmdə müdafiəsi və təşviqi üçün vacibdir. Nəticə etibarilə, strateji kommunikasiyalar müasir beynəlxalq münasibətlərdə dövlətlərin informasiya siyasətinin effektivliyini artırmaq, milli maraqlarını qorumaq və beynəlxalq imicini möhkəmləndirmək, milli-mədəni dəyərlərinin təbliği üçün əvəzsiz vasitədir. Dövlətlərarası münasibətlər müstəvisində bu vasitələrin reallaşdırılması müxtəlif sahələr və istiqamətlər üzrə həyata keçirilir. Reallaşma platformaları kimi beynəlxalq strateji kommunikasiya təlim və sammitlərində iştirak, diaspora təşkilatları və xarici mediya kampaniyaları ilə sıx əməkdaşlıqlar, enerji, logistika, təhlükəsizlik, mədəniyyət sahələrində məqsədyönlü ünsiyyətin qurulması və s. böyük önəm daşıyır. Bir sözlə, strateji kommunikasiya beynəlxalq münasibətlərdə dövlətlərin informasiya mühitində üstünlük qazanmasına, ictimai rəyə təsir etməsinə və diplomatik məqsədlərinə nail olmasına xidmət edir.
Açar sözlər: beynəlxalq münasibətlər, strateji kommunikasiya, ictimai diplomatiya, yumşaq güc.