BAHAR HÜSEYN
Bakı Dövlət Universitetinin müəllimi,
siyasi elmlər üzrə fəlsəfə doktoru
RUSİYA-UKRAYNA MÜHARİBƏSİ
BÖYÜK DÖVLƏTLƏRİN QARŞIDURMASI KONTEKSTİNDƏ
DOI: https://doi.org/10.36719/2708-065X/111/156-162
Rusiya-Ukrayna müharibəsi XXI əsrin beynəlxalq münasibətlər sistemində dərin geosiyasi dəyişikliklərə səbəb olaraq böyük dövlətlərin qarşıdurmasının yenidən aktuallaşdığını göstərir. Müharibə təkcə iki dövlət arasında hərbi toqquşma deyil, həm də qlobal güc mərkəzləri – ABŞ, Avropa İttifaqı, Rusiya və Çinin strateji maraqlarının kəsişdiyi geosiyasi qarşıdurma meydanına çevrilmişdir. Məqalədə münaqişənin yaranma dinamikası, regional və qlobal təhlükəsizlik arxitekturasına təsiri, sanksiyalar sisteminin Rusiya iqtisadiyyatı və beynəlxalq enerji bazarları üçün nəticələri, NATO-nun Şərqə doğru genişlənməsi kontekstində ortaya çıxan fundamental ziddiyyətlər təhlil olunur. Eyni zamanda Ukraynanın hərbi-siyasi dəstək mexanizmləri, Qərbin vahid mövqeyinin formalaşması və informasiya müharibəsinin yeni texnologiyalar fonunda rolu araşdırılır. Tədqiqat göstərir ki, müharibə beynəlxalq sistemdə güc balansını dəyişdirməklə yanaşı, gələcəkdə uzunmüddətli geopolitik bloklaşma və yeni soyuq müharibə riskini artırır. Məqalə həm klassik güc nəzəriyyələrinə, həm də müasir təhlükəsizlik yanaşmalarına əsaslanmaqla böyük dövlətlərin qarşıdurmasının strateji mahiyyətini izah edir.
Açar sözlər: Rusiya-Ukrayna müharibəsi, geopolitika, böyük dövlətlərin qarşıdurması, NATO, sanksiyalar, qlobal təhlükəsizlik.