XAQAN BALAYEV
Bakı Mühəndislik Universitetinin “Ümumi fənlər” kafedrasının dosenti,
siyasi elmlər üzrə fəlsəfə doktoru
RABİL MEHTİYEV
Bakı Mühəndislik Universitetinin “Ümumi fənlər” kafedrasının dosenti,
fəlsəfə üzrə fəlsəfə doktoru
AZƏRBAYCAN ÜMUMŞƏRQ SİVİLİZASİYASININ
MƏRKƏZLƏRİNDƏN BİRİ KİMİ
DOI: https://doi.org/10.36719/2708-065X/113/5-10
Azərbaycan tarixən zəngin mədəni irsi ilə məşhur olmuş, ərazimizdə meydana gəlmiş Şirvanşahlar, Ağqoyunlu, Səfəvi və digər dövlətlərimizdə elmə, mədəniyyətə, incəsənətə, təhsilə xüsusi önəm verilmiş, orta əsr Azərbaycan şəhərləri Şərqin yüksək inkişaf səviyyəsində olan elm və mədəniyyət mərkəzləri kimi qəbul edilmişdi. Eyni zamanda Səfəvilər dövlətində Azərbaycan dili dövlət dili statusu qazanaraq böyük bir coğrafi ərazidə hakim dillərdən biri olmuşdur. XIX yüzillikdə Rusiya və İran imperiyaları tərəfindən bölüşdürüldükdən sonra da Azərbaycan Ümumşərq Sivilizasiyaları tarixində önəmli mövqeyini qoruyub saxlaya bilmişdi. Rusiyada şərqşünaslıq elminin yaradılmasında və inkişaf etdirilməsində azərbaycanlı alimlərin böyük xidmətləri olmuşdu. Rusiya imperiyası dağıldıqdan sonra şərq xalqları tarixində ilk demokratik cümhuriyyətin əsası məhz Azərbaycan xalqı tərəfindən qoyulmuşdu. Azərbaycan Demokratik Respublikası (1918-1920) qərb siyasi idarəçilik qaydalarını uğurla tətbiq edə bilmişdi. Müasir dövrdə Azərbaycan Respublikası ADR-in varisi kimi uğurla fəaliyyət göstərməkdədir.
Açar sözlər: Sivilizasiyalar, Azərbaycan, mədəniyyət, şərq ölkələri, intibah dövrü.