BALAMİRZƏ MƏMMƏDLİ
Bakı Dövlət Universitetinin doktorantı
AZƏRBAYCAN RESPUBLİKASI VƏ ABŞ ARASINDA
İLK SİYASİ-DİPLOMATİK MÜNASİBƏTLƏRİN QURULMASI
VƏTƏN TARİXŞÜNASLIĞINDA
Sovet İttifaqının süqutundan sonra dünyanın yeganə supergücünə çevrilmiş ABŞ ilə öz dövlət müstəqilliyini yenicə bərpa etmiş Azərbaycan Respublikası arasında siyasi-diplomatik münasibətlər Azərbaycanın müstəqil xarici siyasət kursunun elə ilk vaxtlarından etibarən olduqca böyük əhəmiyyət kəsb etmişdir və etməkdədir. ABŞ da öz növbəsində nəinki Cənubi Qafqazda, eləcə də bütün dünyada ən mühüm geostrateji möqveyə malik dövlətlərdən biri olan, müstəqilliyini yenicə bərpa etmiş Azərbaycanla ilk anlardan diplomatik münasibətlər qurmaq marağında olmuş və bunun nəticəsidir ki, 1991-ci ilin sonlarında Birləşmiş Ştatlar hökuməti müstəqil Azərbaycan Respublikasını rəsmi olaraq tanımışdır. Bunun ardınca, Azərbaycan ilə ABŞ arasında ilkin siyasi-diplomatik münasibətlərin qurulması sahəsində ilk əməli addımlar atılmışdır. Bütün bu məsələlər Vətən tarixşünaslığında bir çox tədqiqatçıların (M.Qasımlı, Ə.Həsənov, E.Nəsirov, F.İsmayılov, İ.Musa və d.) araşdırmalarında geniş şəkildə öz əksini tapmışdır. Məqalədə həmin tədqiqat əsərlərinin, tarixşünaslıq materiallarının müqayisəli təhlili aparılmış və bunun əsasında Azərbaycan və ABŞ arasında ilk siyasi-diplomatik münasibətlərin qurulması tədqiq olunmuşdur.
Açar sözlər: Azərbaycan Respublikası, ABŞ, müstəqilliyin bərpası, xarici siyasət, ilkin diplomatik münasibətlər, tarixşünaslıq.